पोखरा, १ भदौ -  स्रष्टा झलक विश्वकर्मा (कुमार) द्वारा लिखित गैरआख्यानमूलक कृति राजनीतिक क्रान्तिको ओझेलमा दलित मुक्ति’ पुस्तक विमोचन गरिएको छ l समानान्तर साहित्यिक मञ्च पोखराको आयोजनामा झलक विश्वकर्माद्वारा लिखित ‘राजनीतिक क्रान्तिको ओझेलमा दलित मुक्ति’ पुस्तकको शनिबार भएको लोकार्पण समारोहका वक्ताहरूले 'राजनीतिक क्रान्तिले धेरै परिवर्तन गरे पनि दलित मुक्ति आन्दोलनलाई तार्किक निष्कर्षमा पुर्याउन नसकिएको ठहर गरेका छन् l 

उत्पीडित आन्दोलनका अथक योद्दा सामाजिक अभियन्ता राम नेपालीले जातीय विभेदले नेपाली समाजलाई पछि पारेको तर्क गर्दै त्यसलाई क्रमशः चिर्दै जानुपर्ने बताए । उनले ठूला कुरा नगरी व्यावहारिक तवरले समस्या समाधान गर्नुपर्ने औल्याउँदै सबै मानिसमा मानवीय संवेदना हुनुपर्ने उल्लेख गरे ।

पीडित समुदायको तर्फबाट स्याङ्जा उदयचौर दूग्धकाण्ड् संघर्ष समितिमा प्रत्यक्ष सहभागी पेलाकोटकी सामाजिक व्यक्तित्व नेतृ धनमाया विश्वकर्मा, नेपाल दलित संघ (FEDO) कास्की अध्यक्ष दुर्गाबहादुर सुनार,दलित महिला संघ कास्की अध्यक्ष लक्ष्मी खाती, आवाज नेपालमा प्रकाश सुनार, पोखरा महानगरपालिका वडा नं. ५ का पूर्व वडाध्यक्ष कवि सहित्यकार धनबहादुर नेपाली, पोखरा २४ की वडा सदस्य मैयाँ नेपाली, नेपाल दलित संघ स्याङजाका सभापति लिलबहादुर रम्तेल,संस्कृत विश्व विद्यालयका प्राध्यापक कृष्ण सुनार, पोखरा महानगर कार्यपालिका सदस्य दीपक घिमिरे, पोखरा १४ का वडा सदस्य तनुजा सिके लगायतले धारणा राखे । उनीहरुले स्रष्टाप्रति आभार प्रकट गर्दै नेपालको दलित मुक्ति आन्दोलनमा पुस्तकीय विचारले भूमिका खेल्ने स्पष्ट पारे ।

दलित जनप्रतिनिधिले समेत विभेद खपिरहनु परेको स्मरण गर्दै उनीहरूले दलित समुदायलाई आर्थिक रुपमा सशक्तीकरण गर्नुपर्ने , दलितभित्रको जातीय असन्तुलन तोड्नुपर्ने , छुवाछुतको पीडा असहयीय हुने,राजनीति भन्दा माथि उठी दलित आन्दोलनलाई तार्किक निष्कर्षमा पुरयाउनु पर्नेमा जोड दिए । पुस्तक समीक्षा गर्दै दलित अभियन्ता प्रेम गदाल (विश्वकर्मा) ले दलित मुक्ति आन्दोलनको महत्वपूर्ण दस्तावेजका रूपमा पुस्तक रहने धारणा राख्दै पुस्तक भाषा सरलमा लेखिएको गण्डकीको भूगोल सुहाउँदो रहेको स्पष्ट पारे।उनले कतिपय स्रष्टालाई उत्पीडित समुदायको पक्षमा कलम चलाउँदा बिटुलो भइने भन्ने भावना जागृत हुने गरेको धारणा राख्दै उत्पीडित जनतालाई चेतना दिने साहित्य नै दलित साहित्य भएको तर्क गरे ।

‘राजनीतिक क्रान्तिको ओझेलमा दलित मुक्ति’ स्रष्टा झलक विश्वकर्मा (कुमार) ले पुस्तक मार्फत् सामाजिक व्यवस्था तथा अवस्थाको गहिरो चिरफार गरेको स्पष्ट पार्दै कतिपय आफ्नै जीवनमा घटेका घटना समेटेको उल्लेख गरे। कोभिड समयको सदुपयोग गर्दै पुस्तकका अधिकांश विषयवस्तु तयार पारेको स्मरण गर्दै स्रष्टा विश्वकर्माले पुस्तक प्रकाशनमा सहयोग पुर्याउनु हुने सबै प्रतिआभार प्रकट गरे । समानान्तर साहित्यिक मञ्च पोखराका अध्यक्ष कवि,गितकार,साहित्यकार विश्वराज रसाइलीको अध्यक्षतामा भएको कार्यक्रममा संस्थापक सदस्य सि.बि. संगमले स्वागत मन्तब्य राख्नु भएको थियोे भने सचिव बुद्धिबहादुर विश्वकर्माले कार्यक्रम सञ्चालन गरेका थिए । कार्यक्रममा झन्डै १०० जनाको उपस्थिति रहेको थियो l 

पुस्तकमा दलित मुक्तिको सवाल, दलित क्रान्ति ओझेलमा पर्नुको कारण, आजसम्म भएका दलित आन्दोलन समस्या र निदानका विविध विषय लेखकका व्यक्तिगत भोगाइ आदिलाई समेटिएको छ l पुस्तकमा विभिन्न ३२ विषय समेटिएको छ l