न्युयोर्क अमेरिका, कार्तिक १४ 

व्यक्ति हत्या अभियोगमा अदालतबाट दोषी ठहर भई जन्मकैदको सजाय पाएका बाँके नेपालगञ्जका गुण्डा नाइके 'रिगल' भनिने योग ढकाल  राष्ट्रपति रामचन्द्र पौडेलले कैद  माफी गरेपछि गत असोज ३ गते संविधान दिवसको दिन  छुटेका  थिए l राष्ट्रपतिको यो निर्णयको चौतर्फी आलोचना र विरोध भइरहेको छ । राष्ट्रपतिले गरेको निर्णयमा राजनीतिक पार्टीको दवावका कारण हत्यारालाई माफी दिएको भन्दै यो निर्णय बदर गरेर रिगललाई जेल चलान गर्नुपर्ने माग व्यापक रूपमा  रहेको छ । नेपालमा पनि सरोकारवालाहरू विरोधमा छन् भने रिगलाद्वारा हत्या गरिएका चेतन मानन्धरकी श्रीमती भारती शेर्पा माइतीघर मण्डलमा रिले अनशनमा छन् l अदालतमा भारतीले दायर गरेको मुद्दाको समेत सुनुवाई चलिरहेको छ l

यसैबिच  अमेरिकाको न्यूयोर्कमा रहेको युएनको मुख्यालय अगाडि पनि विरोध प्रदर्शन भएको छ । रिगललाई फेरि प्रक्राउ गरेर जेल चलान गर्नुपर्ने माग गर्दै यूएनको मुख्यालय अगाडि प्रदर्शन गरिएको हो । यसको नेतृत्व स्वपाका  यूवा नेता तथा एनआरएन विभागका उपप्रमुख प्रणय राणा र अमेरिकाका सामाजिक अभियन्ता रमेश भट्ट 'नेपाली छोरो'ले गरेका थिए । हत्यारालाई आम माफी दिएर मानवअधिकार हनन भएको र यस्तालाई फेरि कारवाही गर्नुपर्ने उनीहरूको माग छ । एक दर्जन भन्दा बढि नेपालीको उपस्थिती रहेको प्रदर्शनमा सबैले  प्ले कार्ड बोकेका थिए । जसमा न्याय मरेको देश, अपराधको राजनितिकरण बन्द गर, कानुनी राज्यको स्थापना गरौ, सरकारको अराजकता विरुद्ध एकजुट, हत्यारालाई खुला छोडेर नागरिक कसरी बाच्ने, नेपाललाई राजनीतिक  अपराधिकरण हुनबाट बचाऊ जस्ता  नारा लेखेर उभिएका थिए । 

यूएनको अगाडि प्रदर्शन गरे केही हदसम्म यसको असर पर्छ भन्ने हेतुले बिरोध प्रदर्शन गरेको बताइएको छ । प्रदर्शनमा बुद्धको सन्देशपनि बाचन गरिएको थियो ।

संविधान दिवसका अवसरमा मन्त्रिपरिषद्को सिफारिसमा राष्ट्रपति पौडेलले ६७० जनाको सजाय माफी मिनाहा गरेका मध्ये रिगल पनि एक हुन् l उनको जेल बसाई अवधि ६० प्रतिशत बाँकी हुँदै उनलाई छुटाउने निर्णय प्रचण्ड सरकारले गरेको हो l 

रिगल जेलमुक्त भएपछि उनका समर्थक युवाले स्वागत गरेका थिए । दाङको घोराहीस्थित जिल्ला कारगारमा रहेका उनलाई समर्थकहरूले स्कर्टिङ गरी नेपालगञ्ज पुर्‍याएका थिए । उनलाई तरुण दलका स्थानीय नेता तथा कार्यकर्ताहरूले स्वागत गरेका थिए ।

रिगल २०७२ साल असार २८ बाँकेको नेपालगञ्जमा दिउँसै खुडा प्रहार गरी हत्या गरेको अभियोगमा दोषी ठहर भएका व्यक्ति हुन्  । रिगलको समूहले सो दिन बाँकेको नेपालगञ्जका २९ वर्षीय चेतन मानन्धरमाथि खुडा प्रहार गरेको थियो । मानन्धरको उपचारका क्रममा निधन भएपछि रिगल फरार भएका थिए । सो समूहका ११ जनालाई प्रहरीले पक्राउ गरेको थियो । 

रिगलले घटनाको एक वर्षपछि जिल्ला प्रहरी कार्यालय बाँकेमा आत्मसमर्पण गरेका थिए । रिगललाई हत्यामा दोषी ठहर गर्दै जिल्ला अदालत बाँकेले २०७५ वैशाखमा सर्वस्वसहित जन्मकैदको सजाय सुनाएको थियो ।  रिगल नेपालगञ्जमा गुण्डागर्दीमा संलग्न थिए । रिगल तत्कालीन तरुण  दल बाँके क्षेत्र नम्बर ३ को क्षेत्रीय सभापतिसमेत थिए ।

रास्वपाका नेता प्रणय राणा भन्छन् : 'पीडित परिवारको न्यायको लागि र नेपाल सरकारलाई  जबाफदेही बनाउन र अपराधको राजनीतिकरणमा बन्देज गर्न, आममाफीको दुरूपयोग रोक्न, गैरकानुनी कार्यलाई निस्तेज गर्दै कानुनी राज्यको सथापनार्थ हामीले  युनाइटेड नेसन्सको ध्यान आकर्षण गर्न यो प्रदर्शन गरेका हौँ l नेपाल सरकार अरू थुप्रै विषय र मानवाधिकार विरुद्द रहेको कारण पनि अन्तराष्ट्रिय दावाव सिर्जना गर्न यस्तो कार्यक्रम गरिएको हो' , प्रदर्शन  बारे राणा प्रष्ट पार्छन l रास्वपा एनआरएन केन्द्रीय विभागका उपप्रमुख राणा  केही हप्ता अघिदेखि अमेरिकामा गएर रास्वपाको राजनीतिक गतिविधि र अमेरिकी युनिभर्मासिटीहरूमा पिएचडी स्कलर र अन्य विद्यार्थीहरूसँग नेपालको शान्ति प्रक्रिया र अन्य विविध विषयमा आफ्नो अनुभव र ज्ञान साटासाट गर्न सक्रिय छन् l