मलाई सबै भन्दा मनपर्ने चाढहरु मध्येमा पर्छ तिहार, फूल बत्ती र रङ्गोलीको सजावट,घरका ढोकामा आगनमा बालिने पाला बत्ति मलाई औधी मनपर्छ l तर आज यहाँ भुकम्पले जाजरकोट र रुकुमको सारा गाउँ शोकमा छ,मानिसहरू असहज र अप्ठ्यारोमा छन् l  अझ पनि चीसो भूँईमा सुत्नुपरेको स्थिति छ l  बिहान राहतमा आएको चाउचाउ खाईयो बेलुका अब के खाने भन्ने अवस्थाले स्थिति दयनीय र करुणामय छ l  घर घरमा घाईते र चिन्तित मनहरू छन् l त्यसैले मैले पनि यो पटक तिहार मनाउन सकिन l विपदमा आफ्नो क्षमता र सिपको कर्तव्य गर्नुमा नै खुशी मान्दैछु l 
बुवाले धेरै पटक फोन गर्नुभयो, यहाँ नेटवर्क राम्रो छैन, फोन काटीईरह्यो ...सायद घर आऊ भन्नलाई गर्नुभाथ्यो होला... यहाँ फोन टिप्दैन, हजुरलाई फेसबुक चलाउन अलि अलि आउँछ, यो पढ्नुहुनेछ भन्ने विश्वास छ l  बुवा, म यहाँ एकदम आराम छु l  बिल्कुलै  नमिठो नमान्ननु होला l  ममीलाई पनि खल्लो नमान्नु भन्दिनुहोला l हजुरकी छोरी कर्तव्यमा दत्तचित्त छे l आपदमा सहयोग गर्नु मानवीय धर्म हो बुबा l झन् हजुरकी छोरी एउटा चिकित्सक र जनअभिमतको भार बोकेकी जनताकी प्रतिनिधि पनि हो l मैले आफ्नो सुख र खुसी कटौती गरेर भए पनि जनताको सेवामा तल्लीन हुनुपर्छ l यसरी नै बुझ्नु बुझाउनु होला l हामीलाई आफ्नो खुशी र सुख खोजेर बस्ने छुट छैन बुबा l हामी सेवा गर्ने प्रण गरेर राजनीतिमा आएका हौँ l सेवा र सहयोग नै हाम्रो दर्शन हो , मान्यता हो l सिद्दान्त हो l राजनीतिक आभीष्ट हो l 

यतिबेला जाजरकोटलगायत भूकम्पपीडितलाई मेरो निधारको टीका भन्दा मलम पट्टिको खाँचो छ l आवश्यक परामर्श र हेरचाहको जरुरी छ l त्यसैले म यतै छु l 

मेरो प्यारो भाइ,

आजसम्म कहिल्यै टीका छुटेको थिएन, यसपाली काकाको छोरी (तिम्रो बहिनी)को हातको टीकका लगाउनु है l  मेरो आशिर्वाद र माया सधैँलाई छँदैछ l 
अनि मेरा कजन दाजु भाइहरू अस्ट्रेलियाबाट यसपटक चाहिँ सांसद बहिनीको हातको टिका लाउँछु भनि धेरै वर्षपछि नेपाल आउनुभएको रहेछ, माफ गर्नुहोला है यसपालि  म उपलब्ध हुन सकिन l  हजुरहरू पनि काकाको छोरी (बहिनी) सँगै टिका लाउनु है l 
अब आउँदा वर्षमा सबै परदेशमा हुनुभएका सारा नेपाली दिदीबहिनीका दाजुभाइलाई नेपाल फर्काई सबैलाई टीका लगाउने वातावरण बनाउनु छ l  यो जिल्ला अस्पतालमा पनि उपकरण जनशक्ती जोडी OT ICU सुरु हुने वातावरण बनाउनु छ l आज म भुकम्पले धेरै मानवीय क्षति भएको दुईवटा गाउँ आठबिसकोट र नलगाढमा पिडितहरुसँग हुनेछु l मैले गरिब रोगी दुखीको पीडामा काम गर्तिछु भनेर नै राजनीतिमा आवद्द भएको हुँ l मैले मलाई मेरा आदरणीय दाजुभाइ र दिदीबहिनीले देश व्यापी रूपमा गरेको विश्वास  र सम्मानको खातिर काम गर्नु छ l त्यसैले भूकम्प पीडितको दुखमा सँगै रहेर म यतै छु l  यसले काम गर्छे भनेर नै मलाई ललितपुर बासीले पहिलोपटक नै अनुमोदन गरेर सदन पठाउनु भएको हो l तिहार अर्को वर्ष, फेरि पनि आउँछ l टीका फेरि पनि लगाउँला l अहिले म यहाँ उहाँहरूसँग हुनुपर्छ जस्तो महसुस भयो l मेरो मन मष्तिष्कले यही भन्यो ,मैले यही गरे है l  मेरो चिन्ता बिल्कुलै नलिनुहोला l हजुरहरू सबैलाई तिहार अनि भाइटीकाको शुभकामना ! 

हजुरहरूकी छोरी,दिदी,बहिनी
तोसिमा कार्की
#Jajarkot #Rukum