नेपाल स्रष्टा समाजले आफ्नो १७औँ स्थापना दिवसको अवसरमा साप्ताहिक कार्यक्रम अन्तर्गत तेस्रो दिन निबन्ध वाचन गोष्ठीको आयोजना गर्‍यो । निबन्ध गोष्ठी प्रा.डा.माधवप्रसाद पोखरेलको प्रमुख आतिथ्यमा सप्पन्न भएको थियोे ।

निबन्धकार प्रा.डा पोखरेलले - आफू नचाहाँदा-नचाहाँदै निबन्धकार बनेको प्रसंग उल्लेख गर्नुभयो । विद्यालयमा सिकाइने निबन्ध लेखनबाट वाक्क भएपनि पछि देवकोटा र भैरव अर्यालको निबन्धकारिताबाट आफू प्रभावित भएको बताउनु भयो । दशकौँपछि भएको निबन्ध गोष्ठीले नयाँ पुस्तामा निबन्धको आकर्षण बढ्ने प्रा.डा. पोखरेलको धारणा थियोे ।

विशेष अतिथि प्रसिद्ध समालोचक तथा निबन्धकार प्रा.डा. गोविन्दराज भट्टराईले निबन्धको चौतर्फी उत्साह सञ्चार भइरहेको बेला स्रष्टा समाजको निबन्ध-गोष्ठीले नवीन इतिहास रचेको धारणा व्यक्त गर्नुभयो । वि.सं.२०४३ बैशाख ३ गते सिसासले नेपाल भारत सांस्कृतिक केन्द्रमा निबन्ध वाचनको कार्यक्रम आयोजना गरेको थियोे ।

३७ वर्षपछि पुनः निबन्ध वाचनको कार्यक्रम नेपाली निबन्धका सिद्धहस्त निबन्धकारहरूको उपस्तिथिमा सम्पन्न हुँदा आफूलाई खुसी लागेको स्रष्टा समाजका अध्यक्ष तथा निबन्धकार श्रीओम श्रेष्ठ 'रोदन'ले बताउनु भयो । 'रोदन'ले थप्नुभयो - पछिल्लो समय निबन्धमा केही नयाँ काम गरौं भन्ने हुटहुटीले आफू निबन्धमा निरन्तर समर्पित रहेको बताउनु भयो ।

निबन्ध गोष्ठीमा प्रा.डा. माधव पोखरेल, मोमिला, भीष्म उप्रेती, मित्रलाल पंज्ञानी, डा.गीता त्रिपाठी, डा. रजनी ढकाल, ज्ञानेन्द्र विवश, कुमारी लामा, मुकुन्दराज शर्मा, टङ्क उप्रेती, ज्ञानु अधिकारी, श्रीबाबु कार्की, मोहन चापागाई, रन्जना निरौला र श्रीओम श्रेष्ठ ‘रोदन’लगायतले निबन्ध वाचन गर्नुभएको थियो । कार्यक्रममा नेपाल स्रष्टा समाजका कार्यसमितिका सदस्य मधु पाठकले उपस्थित अभ्यागतहरूलाई स्वागत गर्नु भएको थियोे भनें कार्यक्रम कुशल संचालक कवि तथा निबन्धकार रन्जना निरौलाले गर्नुभएको थियोे ।