काठमाडौं, माघ ६ 

काभ्रेको पाँचखालका अजित मिजारको अन्तरजातीय विवाहकै कारण २०७३ असार २९ गते हत्या भएको निष्कर्ष सहित 'दलितका लागि दलित' आफ्अनो लागि आफैका अभियन्ताहरूले सात वर्षअघि जातीय विभेदका कारण मारिएका  मिजार र उनका परिवारले न्याय नपाए सशक्त आन्दोलन गर्ने चेतावनी दिएको छ । 

 रिपोर्टर्स क्लब नेपालमा शनिवार पत्रकार सम्मेलन गर्दै अभियन्ताहरूले रुकुमका नवराज विकको हत्यामा संलग्नलाई जेल हालेर उनका परिवारलाई न्यायको प्रत्याभूति गराउन सफल भएपछि अब आफूहरुको ध्यान अजित मिजारको परिवारलाई न्याय दिलाउनेतर्फ केन्द्रित भएको र सो पनि सफल बनाएर नै छाड्ने बताए l 

२०७३ असार २५ गते अजित र पाँचखालकै ज्याम्दीकी कल्पना पराजुलीबीच प्रेम विवाह भएको र त्यसको २ दिनपछि असार २९ गते धादिङमा पुर्याएर अजितको केटी पक्षका मानिसहरूले हत्या गरेको उनीहरूको जिकिर छ l  ७ वर्षदेखि पीडित परिवार न्यायका लागि छटपटाइरहेको र अजितको शव अहिले पनि त्रिवि शिक्षण अस्पतालको शव गृहमा दाहसंस्कार कुरेर बसेको उनीहरूले बताए l 

अजित र कल्पनाबीचको प्रेम सम्बन्ध, प्रेम विवाह, परिवारको दबाबबाट अलग्याइएको घटना र त्यससँग जोडिएका कयौँ प्रमाणहरूले अजितको हत्या भएको छर्लंगै हुँदाहुँदै जिल्ला अदालत धादिङले अजितले आत्महत्या गरेको भन्दै प्रतिवादीलाई सफाइ दिएको र उच्च अदालतले पनि जिल्लाकै फैसला सदर गरेको भन्दै अभियन्ताहरूको आपत्ति छ । अजितका बुबा हरिभक्तले सर्वोच्चमा मुद्दा दोहोर्याइ हेरिपाउँ भन्ने निवेदन दिएपनि न्याय पाउने आश कमजोर बन्दै गएकोमा सबैको चिन्ता र चासो रहेको अभियानकर्मीहरूको गुनासो छ l 

दलितका लागि दलित अभियानका संयोजक खगेन्द्र सुनारले जातीय विभेदलाई राज्यको कानुनले नै नै दण्डनीय घोषणा गरेको भएपनि अजितका परिवार राज्यबाट नै पीडित हुनुपरेको बताए । अभियन्ता सुनारले उक्त घटनाको निष्पक्ष छानबिन र पीडितलाई राहत र न्यायको माग गरे l  माग सुनुवाई नभए सम्बद्द सबै पक्ष निगरानीमा रहेको र तिनको प्रतिकार हुने पनि सुनारले जानकारी गराए l 

‘मान्छे उठाएर लगेर हत्या गरी फाँकेको मुद्दालाई आठ वर्षदेखि लास कुरेर बस्ने भन्ने हुन्छ ? यो हुँदैन अब । काठमाडौंमा एउटा आन्दोलनको प्रारम्भ भएको छ । काठमाडौंमा एउटा झिल्कोको प्रारम्भ भएको छ ।’ उनले भने, ‘हिजो नवराजको मुद्दाको फैसला हुँदै गर्दा पनि रुकुम जिल्ला अदालतको गेटमा ओछ्यान लगाएर सुत्दै गर्दा मैले यही उद्घोष गरेको थिएँ । यहाँबाट कि न्याय उठ्छ । किभने हाम्रो लास उठ्छ । नबराज ६ भयो, हामी मर्दा ७ हुन्छ । केही फरक पर्दैन । अजितसँगै त्यो मुर्दाघरमा पनि सुत्न तयार छु ।’

अजितको मुद्दामा सर्वोच्च अदालतले आगामी फागुनको ८ गते पेशी तोकेको उनले बताए । आफूहरुलाई न्यायाधीशलाई श्रद्धाले शिर झुकाएर सलाम ठोक्ने रहर रहेको भन्दै उनले न्यायका भोकाहरुलाई ढुंगा ठोक्न बाध्य नगराउन आग्रह गरे ।

सर्वोच्चमा पेशीको दिन नजिकिँदै गर्दा पीडक पक्षहरूले अजितका आमाबाबुहरूलाई धम्क्याउने र विभिन्न दवाब दिने काम गरिरहेको उनको भनाइ छ । मान्छेले मान्छेलाई दलित भएकै कारण मारिदिने भन्ने कुरा सह्य नहुने उनले बताए । यसको प्रतिकार र जवाफी कारबाही हुने उनले सुनुवार उद्घोष गरे ।

नेकपा (एमाले) का नेता जितु गौतमले जातीय भेदभाव छुवाछुत कसुर सजाय ऐनको कार्यान्वय अजित मिजारको फैसलासँग जोडिएको बताए । यस अभियानलाई सबै दलित संघ संगठन र राजनीतिक दलहरूले समर्थन गर्नु जरुरी रहेको बताए । उनले अजित मिजारले न्याय पाउने विश्वास व्यक्त गरे ।

अजित मिजारकी आमा काली मिजारले आफूहरूले न्याय पाउनु पर्ने र दोषीलाई कानुन बमोजिमको कारबाही हुनुपर्ने बताईन् । हामीलाई अजितले आत्महत्या गरेको भनेर झुक्याएर १० लाख क्षतिपूर्ति दिएको भन्दै उनले उक्त क्षतिपूर्ति के को दिएको हो आफूलाई थाहा नभएको बताईन् ।

'दलितका लागि' दलितका प्रमुख खगेन्द्र सुनारको अगुवाइमा विभिन्न तह र तप्काका अधिकारकर्मी,न्यायकर्मीको उपस्थितिमा भएको पत्रकार सम्मेलनमा सबैको जोड अजित मिजारको लास उठ्नु पर्ने र परिवार सहित मृतक स्वयंको लासले आफ्नो पारिवारिक र सामाजिक संस्कार अनुसार अन्त्यष्टि गर्ने हक पाउनु पर्नेमा जोड दिएका थिए l खगेन्द्र सुनार तिनै मान्छे हुन् जसले नवराज सहितको हत्यालाई न्याय दिएर हत्यारालाई जेल सजाय तोक्ने रुकुमका न्यायाधीश खडगबहादुर केसीसहित समस्त न्यायाप्रेमीलाई धन्यवाद सहित अदालतको गेटमा पुष्प वर्षा गराएर कृतज्ञता ज्ञापन गर्ने संस्कार सुरू गरेका थिए l