काठमाडौँ, माघ २४ 

२००९ काठमाडौँको विशालनगरमा भएको प्रथम महासमिति बैठकदेखि २०८० सम्म ललितपुरमा हुने १२औ महासमिति बैठकमा नेपाली कांग्रेस प्रवेश गरेको छ l तीन पटक स्थगित भइसकेको १२औ महासमितिको बैठक यो पटक भने स्थगित हुने सम्भावना न्यून छ l 

आगामी फागुन ७–१० मा हुने कांग्रेसको महासमिति बैठकको तयारी भैरहेको चलिरहेको छ । ०७८ मङ्सिरमा सम्पन्न पार्टीको १४ औँ महाधिवेशनपछि कांग्रेसले पहिलो पटक महासमिति बैठक गर्न लागेको हो । १४ औँ महाधिवेशनमा कांग्रेसले नीतिमाथि कुनै छलफल नगरी पदाधिकारी र सदस्यको निर्वाचन मात्रै गरेको थियो । ६ महिनाभित्र छुट्टै नीति महाधिवेशन गर्ने निर्णय गरेको कांग्रेसले फागुनमा महासमिति बैठकबाट आगामी नीति तय गर्न लागेको हो । विधानले नीति महाधिवेशनको व्यवस्था नगरेको र सहभागी प्रतिनिधिको विषयमा जटिलता देखिएपछि कांग्रेसले महासमितिलाई नै नीति अधिवेशनको रूपमा लिएको  देखिन्छ । यसर्थ महासमिति बैठकबारे विशेष चासो र नीतिगत समीक्षाको दवावमा नेपाली कांग्रेस रहेको छ l महासमिति बैठकमा उपसभापति पूर्णबहादुर खड्काले नीतिगत, महामन्त्री गगन थापाले साङ्गठनिक र अर्का महामन्त्री विश्वप्रकाश शर्माले समसामयिक राजनीतिक मुद्दा समेटेर प्रतिवेदन प्रस्तुत गर्ने छन् l  

  उपसमिति संयोजक
कांग्रेसले महासमिति बैठकका लागि ललितपुरको गोदावरीस्थित सनराइज सम्मेलन केन्द्र बुक गरिसकेको छ भने महासमितिका लागि सबै उपसमिति गठन भइ सकेका छन् l 

समितिहरूमा केन्द्रीय समिति, प्रदेश समितिका सभापति, उपत्यकाका कांग्रेस जिल्ला सभापति सदस्य रहेका छन् । प्रचार-प्रसार उपसमिति बाहेकमा ललितपुरबाट प्रतिनिधित्व गर्ने केन्द्रीय सदस्यलाई संयोजक तोकिएको छ । प्रचार–प्रसार उपसमिति संयोजकमा पार्टी केन्द्रीय सदस्य तथा प्रचार विभाग प्रमुख मीनबहादुर विश्वकर्मा छन् l 

आवास समन्वय उपसमितिको संयोजकमा मदनबहादुर अमात्य, भोजन व्यवस्थापन उपसमिति संयोजकमा उदय शमशेर राणा, यातायात व्यवस्थापन उपसमिति संयोजकमा धना खतिवडा, स्वयंसेवक परिचालन उपसमिति संयोजकमा जीतजंग बस्नेत, स्वास्थ्य समन्वय उपसमिति संयोजकमा उर्मिला नेपाल ‘केसी’ छन् ।

यस्तै प्रदेश समन्वय उपसमिति संयोजकमा कांग्रेस बागमती प्रदेश सभापति इन्द्रबहादुर बानियाँ र स्थानीय व्यवस्थापन उपसमिति संयोजकमा ललितपुर सभापति जितेन्द्र श्रेष्ठलाई चयन गरिएको छ l 

 महाधिवेशन प्रतिनिधि २५ सय हुनेछन् 
कांग्रेसले महासमिति बैठकमा करिब २५ सय प्रतिनिधि रहने कांग्रेसको आङ्कलन छ । १६५ वटा निर्वाचन क्षेत्रबाट मात्रै १८ सय १५ महासमिति सदस्यको प्रतिनिधित्व हुनेछ ।

त्यसबाहेक केन्द्रीय कार्यसमितिका वर्तमान र निवर्तमान पदाधिकारी र सदस्य, एक कार्यकालका लागि निवर्तमान महासमिति सदस्य, भ्रातृ संस्था र जनसम्पर्क समितिबाट समेत महासमिति सदस्यको प्रतिनिधित्व हुनेछ । कांग्रेस केन्द्रीय समिति १६८ सदस्यीय छ । 

कांग्रेसका ३५ देशमा जनसम्पर्क समिति छन् । क्रियाशील सदस्यताका आधारमा एक जनादेखि बढीमा ६ जनासम्म महासमिति सदस्य चयन हुनेछन् । जनसम्पर्क समितिबाट करिब एक सय जना महासमिति सदस्य आउने छन् । यस्तै भ्रातृ र शुभेच्छुक संस्थाको अधिवेशनबाट ३–३ जना महासमिति सदस्य चयन हुनेछन् । 

कांग्रेसका अहिले १३ भ्रातृ संस्था र १८ शुभेच्छुक संस्था छन् । भ्रातृ तथा शुभेच्छुक संस्थाबाट पनि करिब सय जनाले महासमितिमा भाग लिने छन् । सभापतिलाई बढीमा १५ जना महासमिति प्रतिनिधि मनोनीत गर्ने अधिकार छ । २९ जना जिल्ला सभापति, केही सांसद पर्यवेक्षकका रूपमा महासमिति बैठकमा सहभागी हुनेछन् । 

२५ प्रतिनिधि छनोट हुन बाँकी जिल्ला र क्षेत्रहरू यस प्रकार छन् : 
 भोजपुर, सुनसरी–१, महोत्तरी, बारा, पर्सा, सप्तरी–१, सिन्धुली–२, धादिङ, काठमाडौँ– ५ र ६, दोलखा, रामेछाप, पर्वत, कपिलवस्तु, दाङ–३, कञ्चनपुर–१ 

खर्च साढे दुई करोड, दर्ता शुल्क ३ हजार
महासमिति बैठकका लागि कांग्रेसले साढे दुई करोड खर्च हुने अनुमानित हिसाब निकालेको छ । ‘सबै पार्टीका काम जति पार्टीका क्रियाशील सदस्यले तिर्ने लेबी र सदस्यता शुल्कबाट व्यवस्थापन गरिने छ l  ‘कांग्रेस भनेको आम जनताको पार्टी हो । नागरिकहरूले स्वतःस्फूर्त रूपमा दिने रकमलाई नाइनास्ती गरिँदैन । तर, कसैसँग चन्दा माग्ने नीति छैन भन्छन् नेपाली कांग्रेस पार्टीका मुख्य सचिव कृष्णप्रसाद पौडेल l उनले दिएको जानकारी अनुसार महासमिति बैठकमा सहभागी हुने प्रतिनिधिसँग प्रतिव्यक्ति ३ हजार शुल्क  राखिएको र हरेक महासमिति सदस्यले दर्ता शुल्क अनिवार्य रूपमा दाखिला गर्नुपर्ने छ l