‘बिष नगर्ची राष्ट्रिय व्यक्तित्व सम्मान २०८०' बाट उपसचिव सीता परियार दलित समुदायबाट पहिलो प्रमुख जिल्ला अधिकारी (सिडिओ) लागायत पाँच जनालाई प्रदान गरिएको छ ।
गोर्खा फाउण्डेशन झापाले राष्ट्रनिर्माता पृथ्वीनारायण शाहका आर्थिक सल्लाहकार भनिएका विश्वेश्वर नौबाग अर्थात विषे नगर्चीको योगदानलाई स्मरण गर्दै उनको स्मृतिमा स्थापना गरेको ‘बिषे नगर्ची राष्ट्रिय व्यक्तित्व २०८० सम्मान वितरण गरेको छ l  
सम्मानित सम्मानित व्यक्तित्वहरूमा पूर्व प्रमुख जिल्ला अधिकारी (हुम्ला ) सीता परियार, वरिष्ठ चलचित्र निर्देशक तुलसी घिमिरे, महानायक राजेश हमाल, भूवनसिंह विश्वकर्मा रहेका छन् । विश्वकर्मा अन्टार्टिका महादेश पुग्ने पहिलो नेपाली नागरिक हुन् ।
नगद ५१ हजार पुरस्कार राशिसहित उनीहरूलाई कार्यक्रमका प्रमुख अतिथि राष्ट्रिय सभा सदस्य गोपाल कुमार वस्नेतले सम्मानपत्र प्रदान गरेका थिए । 
गोर्खा फाउण्डेशनका अध्यक्ष वीरवहादुर दर्नालको अध्यक्षतामा भएको कार्यक्रममा फाउण्डेशनका महासचिव रञ्जित परियारले स्वागत गरेका थिए ।
कार्यक्रममा प्रमुख जिल्ला अधिकारी बन्धुप्रसाद बास्तोला, जिल्ला प्रहरी कार्यालय झापाका प्रहरी उपरीक्षक मिलन केसी, सशस्त्र प्रहरी उपरीक्षक कविन्द्र राई, अरिदमन गण चारआलीका गणपति प्राजु वस्नेत, नेपाली कांग्रेस झापाका सभापति देउकुमार थेवे, झापा गोल्डकपका अध्यक्ष विनोद बस्नेतलगायतको आतिथ्यतामा सम्मान कार्यक्रम सम्पन्न भएको थियो ।

सम्मानित व्यक्तित्वहरूको योगदान 

नेपालको विविध क्षेत्रमा योगदान गरेका र पहिचान बनाएका पाँच व्यक्तित्वहरू ‘बिषे नगर्ची राष्ट्रिय व्यक्तित्व सम्मान २०८०' बाट सम्मानित भएका छन् l 

सीता परियार 

पहिलो नेपाली दलित महिला प्रमुख जिल्ला अधिकारी सीता परियार नेपाली समाजको पिंधमा रहेको उत्पीडित समुदाय, त्यसमा पनि महिलाको सामाजिक, राजनीतिक तथा निजामती क्षेत्रमा उपस्थितिको अवस्था उत्साहप्रद छैन l दलित समुदायको लागि सामाजिक,आर्थिक, राजनीतिक, सांस्कृतिक उत्पीडन  आज पर्यन्त डरलाग्दो छ l दलित महिलाहरूले भोग्नु परेको स्थिति झन् नाजुक छ l यस्तो स्थितिमा पनि बाधा व्यवधान र असहजताका अनेक बार र पर्खालहरू भत्काउँदै उच्च शिक्षा प्राप्त गर्दै सीता परियार २०६८ मा निजामती सेवामा प्रवेश गरी उत्पीडित महिलाबाट पहिलो स्थानीय विकास अधिकारी तथा प्रमुख जिल्ला अधिकारी बन्ने अवसर प्राप्त प्रशासक हुन् । इलाका प्रशासन कार्यालय साँखुमा कार्यरत सीता परियारलाई गृहमन्त्रालयले चैत २१ गते अध्यागमन कार्यालय त्रिभुवन अन्तराष्ट्रिय विमानस्थल वरिष्ठ अध्यागमन अधिकृतमा सरुवा गरेको छ l 

राजेश हमाल 

नेपाली चलचित्र क्षेत्रमा विगत चार दशकदेखि सक्रिय हमाललाई समतामूलक समाज निर्माणमा समेत महत्वपूर्ण भूमिका निर्वाह गरेको भन्दै सम्मान गरिएको हो । हमालले दुई वर्ष अघि गैर सरकारी संस्था समता फाउण्डेसनद्वारा निर्मित ‘जातको प्रश्न’ नामक कार्यक्रममा प्रस्तोताको रूपमा काम गरेका थिए ।

तुलसी घिमिरे
 
 नेपाली चलचित्र क्षेत्रमा तुलसी घिमिरेको योगदान उच्च रहेको छ l भारतको कालेबुङका घिमिरेले सन् १९८१ मा ‘बाँसुरी’ वाट चलचित्र क्षेत्र प्रवेश गरेका थिए । उनले करिव चार दशकमा कुशुमे रुमाल, चिनो, लाहुरे, दर्पण छायाँ लगायत दुई दर्जन बढी सर्वोत्कृष्ट चलचित्र निर्माण गरेका थिए । चलचित्रलाई प्रयोग गरेर समतामुलक समाज निर्माणमा समेत योगदान गरेका थिए ।

भुवनसिंह विश्वकर्मा

कार्यक्रममा मानवविहीन अन्टार्क्टिका महादेशमा पहिलो नेपाली पाइला राख्ने भुवनसिंह विश्वकर्मा पनि सम्मानित भएका छन् l  भारतीय गोर्खा रेजिमेण्टमा कार्यरत रहँदा विश्वकर्माले सन् १९८६ र १९९२ मा दुई पटक अन्टाक्र्टिका महादेशको यात्रा गरेका थिए । रुपन्देही, बुटवलका विश्वकर्माको सम्मानमा बुटवल र हेटौंडामा मार्ग पनि बनाइएको छ । उनले २०५५ सालमा प्रतिष्ठित गोर्खा दक्षिणवाहु दोस्रो समेत पाएका थिए । 

महेन्द्र गिरी

झापाका सहकारीकर्मी महेन्द्र गिरीले पनि पहिलो विसे नगर्ची राष्ट्रिय व्यक्तित्व सम्मानबाट पुरस्कृत भएका छन् । सहकारीमार्फत आर्थिक–सामाजिक जनजीवन चलायमान बनाउन गिरीको भूमिका उल्लेख्य छ । उनी सहकारीका अलवा समर्पण अभियन्ताका अगुवा समेत हुन् । उनले झापामा रहेर पनि ‘एकका लागि एक अभियान, सडक दुर्घटना न्यूनीकरण महाअभियान, जस्ता सामाजिक कर्महरूमार्फत देशभर सकारात्मक सन्देश प्रवाह गरेका छन् l 

तस्बिर : गोर्खा फाउण्डेशनले उपलब्ध गराएको हो l