विश्वेश्वरप्रसाद कोइराला ( १९७१ भाद्र २४ ) यो धर्तीमा आएको पनि १०८ वर्ष पुगिसकेको छ l आफ्नो ६८ वर्षको आयु नेपाल र नेपालीको लागि समाप्त गरेर २०३९ श्रावण ६ गते यो धराबाट बिदा लिएका बीपी बारे अनगिन्ती लेखिए l उनको बहुआयामिक व्यक्तित्व र साहित्यिक पाटो राजनीतिको यात्रा बारे गहन अध्ययन अनुसन्धान भएका छन् l भैरहेका छन् l  बीपी कोइरालाको व्यक्तित्व र कृतित्वको अनेक आयाममा १९ जना विद्वान्हरूले विद्यावारिधि गरिसकेका छन् भने स्नातकोत्तर तह र दर्शनाचार्य तहमा गरेर करिब पाँच सय जना अनुसन्धाताहरूले शोध गरिसकेका छन् l झट्ट हेर्दा अब उनको बारेमा लेख्नुपर्ने धेरै छैनन् जस्तो लाग्छ तथापि अझै धेरै रहस्य चिन्तन र मननको विषय बीपीको समग्र व्यक्तित्वमा रहेको देखिन्छ l उनका बारे मान्छेको आकर्षण र सम्मोहनले ज्यादा देखाउँछ l उनको जादुयी व्यक्तित्व बारे नलट्ठीने राजनीतिज्ञ नेपालमा छैनन् l

 बीपी कोइराला कम्यूनिष्ट पार्टीसँग चर्को मतभेद राख्थे, जबकी कांग्रेस र कम्युनिष्ट मिलेर पंचायत विरुद्द लडौ भन्ने पुस्पलालको अनुरोधलाई बीपीले उपेक्षा गरेका थिए l तथापि नेकपा एमालेका तत्कालीन महासचिव मदन भण्डारीले बीपीको उच्च प्रशंशा गर्दै २०४८ साल तिर एक अन्तर्वार्तामा ‘मलाई मन पर्ने राजनेता बीपी कोइराला हुन् l उनी जस्तो रचनात्मक सोच र शैलीको राजनेता दक्षिण एशियामा मैले देखेको छैन l’ भन्दै अभिव्यक्ति दिएका थिए l 

 सुन्दरीजल स्थिति बीपी बन्दी गृहमा पुगेर प्रचण्डले बीपीले प्रयोग गर्ने सामान छोएर भावुक भएर उनको प्रशंसा गरेको पनि धेरै भएको छैन l बीपी बाँचेका भए नेकपा एमाले बनिसक्थे भनेर ओलीले अवमुल्यन गरेको पनि हिजोअस्ति नै हो l अझ अर्को घतलाग्दो कुरा बीपीलाई फाँसीमा लड़किनबाट जोगाउन उनको मुद्दा फैसला गर्ने पंचायतकालीन न्यायाधीश कम्युनिष्ट समर्थक रहेको प्रमाणित भएको छ l बीपी केन्द्रमा हुनु र उनका विरोधी समेतमा उनको आकर्षण देखिनुको कारण उनको बौद्दिक र सैद्दान्तिक क्षमता उदाहरणीय भएर नै हो l